Scurìgat
de Rosanna Podda

Scurìgat su merì biaitu
in celu e in coru...
fintzas is froris acuendi
s’ermosura intra nuscus spantosus
sbisurant in velu ‘e umbra.
Giai sa noti s’annuntziat
in dònnia frunda, dònnia
impàmpinu de sramentu‘e ‘idi
in donnia arrampu ‘i arrosa.
Muda e dudosa s’airi
est in abetu de su velliudu
chi amantat cosas e criaduras
imboddichendi cristas
àcuas e pranuras ...chen’e lassai
mancu unu giassu ‘e luxi
chi de luna no calant
miradas e velus de prata.
S’anima puru abetat
aparicendi is cannas a su telarxiu
e-i cuss’ordidu di amori
po tessi’ dì po dì, a fil’e oru luxenti
trama a trama...
sa tela pretziosa de sa vida,
cumossendi oras nodìas
de unu tempus diciosu
chi trigat a s’acostai.
Unu bisu giungit...
de pinnicas olvidadas
e de su crisòlu de sa noti
sgutant prendas...
chi su coru bramat.

Fa buio/Scurisce la sera azzurrata/in cielo e in cuore,/perfino i fiori celando/la bellezza dentro profumi inebrianti/scolorano in velo d’ombra./Già la notte s’annunzia/in ogni fronda, ogni pampino di sarmento di vite,/ ogni ramo di rosa./Muta e dubbiosa l’aria/in attesa del velluto/che ammanta cose e creature/avvolgendo creste acque e pianure/senza lasciare neanche/un varco di luce.../se dalla luna non calano/sguardi e veli d’argento./Anche l’anima aspetta/preparando le canne al telaio/e quell’ordito d’amore/per tessere giorno per giorno/con filo d’oro lucente/trama a trama.../la tela preziosa della vita/amalgamando ore uniche/di un tempo felice/che tarda ad accostarsi./Un sogno giunge.../da pieghe d’oblio/e dal crogiolo della notte/gocciano gemme.../che il cuore brama.

53° Edizione “ Premio Ozieri “
Premio Speciale “ Tonino Ledda “
Ozieri - 29 Settembre 2012