Sceti po Tui
di Guglielmo Piras

Po tui
Sceti po tui
Chi ses totu
Totu su chi seu
Em’ a bolli’ essi’
Murmutu ‘e cantzoni.
Sceti po tui
Chi passientziosa poderas
Custu carongiu tot’atzas
Chi mi strecat e infrissit
Su chi m’est abarrau de su coru.
Chi sentz’ e pàsiu t’acostas
A custa gruta ‘e scuriu
Aundi de sempri bivu incotiu
Po m’aporri’
Guarnissas afestadas
De scaringius tiernus de luna.
Chi m’atobias dengosa
Cun carinnius de undas sullenas
Chi andant e torrant
Torrant sempri.
Sposa, sceti po tui
Oi seu custa perdixedda bianca
Tunda e allisada
Chi arrumbulat cantendi
Che pipiu ingiogatzau
In s’ óru de su mari tuu.
Cras
Una spéndula dorada
De granus de arena
In is ogus tuus ant a luxi’
Che un’arramadura
Fitiana de steddus.

“ mari biu”

Primo Premio a Villanovatulo 2010 - Sezione "Poesie d'amore"