Sassari unì zi sei…?
di Gigi Noce

Sassari mea no ti cunnosciu più…
Più no intendu lu fiaggu di lu pani
ne prufummu d’amenta e di basiri
ne veggu più girani cururaddi
in lammi di pumata i’ li balchoni
ne ciaccutà di femmini ifuttendi
chi alligrabani tutta la carrera

No vi so più in Portha di Mazzeddu
cabaddi e carrettoni o carraiori
o pizzinni di moiu sempri pronti
a purthazzi la roba a li “signori”

Unì è chissa butrea minori assai
farendi a manu manca a lu marchaddu
chi i’ l’oru di la gianna sempri abìa
baccaglià posthu a mogliu i’ l’isthagnara
e un carthellinu ischrittu chi parìa
chi un baccaglià si fussia cuiubaddu*?

Sassari mea cantu t’aggiu zirchaddu!

T’aggiu zirchaddu i’ l’isthrinti minori
i’ l’ ammenti rimusi i’ lu zaibeddu
i’ la genti chi passa e no s’arreggi…
zirchendi d’intindì lu to’ fabeddu

No più frascha di vinu pa ammintammi
in calloggu vindiani l’abbaddu
no più li mezzi porthi d’una voltha
ma gianni in allumminiu anodizzaddu

Soggu faraddu in un’isthrintaredda
in un patiu basgiaddi da lu sori
dui balchoni e una gianna beddi fatti
ma… isciumpiaddi da cundizionadori

T’aggiu zirchadda immezu a la triddìa
di lu Vagliu, di Santu Purinari
i’ l’aiburi “in prisgioni” i’ l’Istazioni
in Santa Caddarina e i’ li currari

Finzamenta chi mi soggu isthraccaddu
zirchendi lu chi forsi no v’è più
ma tu…
datti un’ischuzzuradda… foramari
acchì cussì… no ti cunnosciu più!

“Zirchendi lu temp’andaddu”

*Baccalà ammogliato

2° premio al XX concorso di Poesia Sarda CREI ACLI in Sassari