MODA A SANTU CHIRIGU

Cando ancora sa zente pregada
In catacumbas frittas che su nie
Ca creiant in su Deus Signore
Chirigu Santu naschiat inie
In Iconiu in Asia Minore
De su quartu seculu in s’intrada
Ma sa vida terrena non li dada
Un’isperanzia dechida e serena
Ma non li dada sa vida terrena
Un’isperanzia serena e dechida
Ma non li dada sa terrena vida
Una serena e dechida isperanzia
Ca sos paganos cun dura arroganzia
Lassan dolore tristur’e angustia.

Giulitta po su fizu impauria
A Tarso si ritirat poveritta
Ma mancu su paese intreu girada
Chi enit catturada e posta in bancu
Incue e tanta pena sottoposta
Acapiada cun d’una cadena
In d’unu mare prenu e martirizu
Giulitta impauria po su fizu
A Tarso poveritta si retirada
Ma mancu su paese intreu girada
Chi enit catturada e posta in bancu
Non girada su paese intreu mancu
Chi enit catturada e in bancu posta
Incue a tanta pena sottoposta
Acapiada cun duna cadena
Incue sottoposta a tanta pena
In cussu duru e barbaru terrore.

Cando ancora sa zente pregada
In catacumbas frittas che su nie
Ca creiant in su Deus Signore
Chirigu Santu naschiat inie
In Iconiu in Asia Minore
De su quartu seculu in s’intrada
Ma sa vida terrena non li dada
Un’isperanzia dechida e serena
Ma non li dada sa vida terrena
Un’isperanzia serena e dechida
Ma non li dada sa terrena vida
Una serena e dechida isperanzia
Ca sos paganos cun dura arroganzia
Lassan tristura angustia e dolore.

Chirigu Santu infante minore
In brazzos de Alessandru su zigante
Chirigu Santu su minore infante
De Alessandru su zigante in brazzos
Cando intendet sa mamma in imbarazzos
S’eslamat nende seo Cristianu
D’aria mala su duru paganu
Che l’iscudet tra su muru e s’iscala
Su duru paganu d’aria mala
Che l’iscudet tra s’iscala e su muru
D’aria mala su paganu duru
Tra su muru e s’iscala che liscude
E s’innozente infantile virtude
Morit in cussa terra trista e dura.

Cando ancora sa zente pregada
In catacumbas frittas che su nie
Ca creiant in su Deus Signore
Chirigu Santu naschiat inie
In Iconiu in Asia Minore
De su quartu seculu in s’intrada
Ma sa vida terrena non li dada
Un’isperanzia dechida e serena
Ma non li dada sa vida terrena
Un’isperanzia serena e dechida
Ma non li dada sa terrena vida

Una serena e dechida isperanzia
Ca sos paganos cun dura arroganzia
Lassan dolore angustia e tristura.

Morint in cussa trista disaura
De cussu tribunale in cussu bancu
Ma cun sa Mamma in velu biancu
Che sun pigados paris a su chelu
Ma cun sa Mamma in su biancu velu
Paris che sunu a su chelu pigados
Dae tando tantos los ana pregados
Giulitta Santa e Chirigu s’eroe
Deo pregare innoghe bos chelz’oe
In poesia sarda in rima a boghe
Deo pregare bos chelz’oe innoghe
In rima a boghe in sarda poesia
Azuae s’intera idda mia
Turistas e istranzos totugantos
Sos anzianos cun sa gioventude
Cun s’azudu ’e sAlta Onnipotenzia
E sa festa de custos caros Santos
A fagher atros annos cun salude
E bona notte e bona permanenzia.

Ardauli, 15.07.1997

Serafino Putzolu