Salighes pranghigosu
de Salvatore Fancello

Sò torradu a su logu tristu e mudu
de S' arcu 'e Tenosile e Oddurue* ---------------------- *Toponimi
inue mortu e sicadu che ses tue
a ti porrire s' urtimu saludu.
---- e ispozu ti miro in cussa serra
---- inue prima forte e rigogliosu
---- creschìas affundande isperanzosu
---- sas raighinas tuas a sa terra.
Non prus da cudda pupa 'irde braghera
ti falana sas naes rue rue,
da inue isconiamus zeo e tue
che candelabros lagrimas de chera.
----Ca fisti su cumpanzu 'e milli dozas
----de infinidas batallas e de gosu,
----Salighe de sentidu, pranghigosu,
----chi m' accollìas sutta cussas fozas.
E b' est irgangheradu su banchittu
inue pessamentosu mi setzia,
cando ispirada carchi poesia
mi'eniat de ponner in iscrittu.
----E totora, totora cussos gutzos
----chi dae sas fozas tuas falaian,
----lagrimas e suore lavaian
----dae sa conca finas a cambutzos.
E chin tegus su sero 'it un' ispantu
chi mi daiat piogu, e li fit cura
a sos suspiros mios sa friscura
chi a piuttu lompiat che unu santu.
----Fortzis t' hana siccadu sas caluras
----o 'entos traessarzos e de susu,
----o fortzis tue puru has fattu abusu
----de dies assuttas e nottes iscuras.
Ma su 'e ti mirare in custu logu
ispozu, a prudigore, e chene sida
mi narat ca po nois est finida
sa cuntierra ....S' edade 'e su 'iogu.
----E como inoghe intendo frittu ebbia
----chi m' erpilat e tremet sa carena.
----A disora una lagrima aliena
----est falande penosa in cara mia !

chimuzone

Menzione al Concorso di Poesia Tiu Pera Sulis - Tonara