Aïte a nos bochire parebare
pro drimpire unu mundu ‘e bonu acordu?
Sonadores de prummu, ch’a cuncordu
dìlluru ‘e morte faghides ballare...
...nade-nollu: cand'azis a intonare
ballu a sonete...‘e paghe armonïosa?
Rùndine, astore, àbila e mariposa
pigade ‘olu chin podestu motu
e chin s’isperu prus bìu e devotu
tzessade ‘e donzi gherra, su vïazu.
Naes, armadas de bonu corazu
àbas de oceanos conchistade,
e chin su ‘entu in pupa dissipade
s’ispruma ‘e sas undadas de sa gherra,
carignende sas mamas de sa terra
ch’an pèrdidu maridu, fizu e vida,
in trempas de cumbatta...e d’infinida
tribulia, ch’an fertu animu e coro;
...e lastimende su penare insoro:
“iscrarèmmas sa paghe irbïarida”.

Menzione al secondo concorso poetico “FORTI CON LE RIME PER LA PACE 2024 - BULZI