Salvatore Ladu

Tristu su sero, isteddos da s'aera

mi lagrimant in coro malumore.

Ca senza tumba, dolu, ne calore

suta custa frassada e chen"ispera

Tana affunada che cando in galera

sa 'etza nave mia. Ite dolore!

Solu s'ocru marinu¹ atzinnat tristu

paret pedinde dolu a Zesu Gristu.

Si puru a tie mustro risu in lara

e mi cunfìdo che fidele amante,

bella che sole! Sa prus elegante

ses istada pro mè, ses beru nara?

S'unda salia m'at frunzidu in cara

a sa carena tua simizante,

cando a caddu a s'unda e deo a tie

bid'amus nascher e morrer sa die.

Andande a s'arza e fala in mare apertu

fin semper' issas chi ti ballaiant

caentes libeciadas t'ispinghiant

Grecu e Levante poninde cussertu

a sos bentos de mare e de desertu

sos mustazzos de prua rispondiant.

Chi est ch'in cussu poju t'at ligada

sola che fera, totu ruinzada?

Soas chi ti cherent morta e sepultada

nò ischint chie ses e non nd'ant pena

naralis de sos cantos de sirena

chi m'ant ischidu in sa nott'isteddada

e sa luna cumpanza innamorada

artuddavat su pilu in sa carena.

Como sun totu contos de contare

pintande a tie in su pasidu mare.