Sa die ‘e sa Befana
di Peppe Concas

A su Volontariadu

Su valore de su volontariadu
es mannu, mannu a parrer meu,
e si prestan pro’ s’amore Deu
in modu dinnitosu e acuradu.

In s’ora chi cherede azzuadu
tristu passande unu momentu feu
faghes che a Simone Cireneu
cad’ un’istante a Cristos sullevadu.

An sos evangelistas sueradu
iscrinde su vangelu tottu intreu
Marcu, Luca, Zuanne e Mateu
àna in sa terra intrea preigadu.

S’istoria Sacra chi tottu lezimos
ue s’iede s’umana frattellanzia
s’arbure chi da su fruttu e s’isperanzia
faghinde bene in s’eternu godimos.

Si sa pannotta nolla dividimos
no’ manca pro nessunu s’abbundanzia
e de artu morale sa sustanzia
su corpus e-i s’anima nutrimos.

S’in su misteru cun fide creimos
menzus nos tratamos in sa vida
ca inoghe es de passazzu s’aparida
cuddae est ‘un’eternu chi vivimos.

Chie nd’à prusu bi pensende azzigu
pro’ allatare sa zente sidida
e gai sa cussenzia es pulida,
e attesu c’addurada s’innimigu.

Bi sun sos malos, e tristu los fontomo
chi sun’infettos de impuridade
lassan morres de famine su frade,
deo ispero chi cambien como.

O Mama Santa de s’Epifania
ca ses meraculosa faghend’oe
e tottugantu su duamizz’e noe,
curalos, tantu custa es maladia.

Sas concas malas de torrare in bonu
sanas e de bonos sentimentos
e de Mosè sos cumandamentos
usene, e lis concedit su perdonu.

Saludo su Volontariadu
e-i sa zente chi àna invitadu.

Bolotana, 18-12-2008