Sa die ‘e Sos Tres Res
di Giuseppe Concas

Occ’annu puru presentes a s’invitu
a sos Tres Res chi dae su Sennore
pro ricumpensa an’a sa festa dirittu:
es pro totu nois un’onore.

A sa naschida sua sun partidos
paris unidos dae s’oriente.
De guida s’istella solamente
cun sos donos insoro preferidos.

A s’arrivu a sa grutta illuminada
de Betlemme a bier su tesoro,
offertu l’ana incensu, mirra e oro
a su Bambinu e a s’Immaculada.

Gaspare, Baldassarre e Melchioro
sa volontade za los at ispintos
a cussa creatura, ca cunvintos
chi fit su Redentore Mannu insoro.

E pro bois chi onz’annu bos prestades
a riunire custu gruppu intreu,
a sa presenzia ‘e s’amore ‘e Deu
pro cunfortu ‘e sorres e de frades,

est amorosa custa fratellanzia
chi a sos anzianos nos tenides:
puru a tavolinu nos servides
su chi tenides totu in abbundanzia.

Ma su regalu mannu es de piusu
s’altu morale in custa cerimonia,
chi es pro nois allegria e gioia
e donu de Maria e de Gesusu.

Bos diat sempre forza e saludu
durante sa ostra permanenzia,
pro dare pius manna s’assistenzia
a su bisonzu, sa manu ‘e s’azudu.

E prego chi siedas sempre attentos
a sos sufferente anzianos
e a totu sos chi non sun sustentos
de paghe e amore lis diedas ranos.

E cun totu sos bonos sentimentos
e cun s’onnipotente azudu sou
vivos rezide sos ringraziamentos,
rinnovedas sa festa dae nou.

Saludo a totu cun d’un’astrint'e manos,
a como un’annu allegros e sanos.