Su pesu a coddu... giughen de su mundu,
trazèndesi sos pes... arranc’arranca,
fratende s’anca dresta a s’anca manca
a donzi passu greu e muribbundu.

Chin s’ànimu in tristia e pensu in bundu
a manos zuntas sono in s’oru ‘e *banca, *baùle
accumpazende a sa funebre *tanca *campusantu
su frutu de s’amore prus prufundu.

Accò, chi sos mermeddos pigan bolu
chin cudd’isetu ‘e su chèrrere ischire,
in cherta ‘e lampalughe...in dudas graes.

Lughedda fraca-fraca, in s’oriolu
nudu ‘e s’incrasa...prontu a los bestire,
a pannos d’iscunfortu, dolu e praes.

Terzu premiu al concorso “Premiu Faustino Nonnis – Anderas 2024 Selargius