Non b’at pispisu ‘e rùndine in padente
che a s’èpuca antiga...b’est su solu
arrèionu ‘e sas fozas...e in bolu,
su nuscu irvanessidu ‘e s’ambiente.

E totu est curpa nostra, est evidente,
dadu chi amus s’òbrigu tzivile
de l’intregare un impignu dechile
che meres ch’ana cura ‘e domm’issoro,
dende riguardu, rispetu e decoro
a su chi nos an sos mannos lassadu.

Eredidade ch’amus trascuradu
pro contibizos de atualidade
ch’andan ifatu a sa modernidade
a brìllia isorta, che bacas muscadas,
pro fraigare òperas muradas
ch’irfàssan donzi situ naturale.

Tzertu, non fit istadu mancu male
crobare su connotu a su progressu,
ma si s’òpera est solu in s’interessu
de sa bussaca ‘e s’imprenditoria...
ch’in muda ‘e milli prantas de olìa
fichit palos d’atarzu, a car’a bentu”,

menzus baddes de cardu e de assentu
...e prados de murtìtzia e malvasia.