S’urtima tessidora

A manzanile sonos de telarzu,
accumpanzados da cantigu a bolu,
a sas bighinas ponent oriolu
dilliriadas in su lumenarzu.

Rimas fizas de isperas e cossolu,
ispricadas cun trazu ’e boghe amena,
che in sicores utios de selena,
abacant angustia e i su dolu.

Impressida ch’isboidas ispolas,
appuntande cun seguros manizos,
paris cun tramas tempus e disizos,
mescas de sas massajas noitzolas.

Tessinzu netzessariu pro vida,
innida panimenta ’e pagu ispesa,
ma funtana de pata e fortilesa,
assegurat bisada rennessida.

Linu creschidu subra corrungones,
iscardadu e filadu cun appentu,
at sos afficos de soles e bentu,
aerzu ’e lunas, nidas istasones.

Postu intro litzos, cun pagu matana,
abritiosa nde faghes prodizu
orropas pausande aizu, aizu,
non t’isbelliant tocos de campana.

Lassas donzi reposu e aranchida
ordis, pinnigas, tramitis e tesses,
su menzus acunortu chi gradesses,
imbucare a bonora totu chida.

Istrepos impitados sunt chietos
e cun su tempus si faghent ghermanos,
sighint isteddos, chinta e oghianos,
ma tue non regolles sos apretos.

Traballas fintzas a lughe ’e candela,
frunzit sa carre e i sos pilos canos
colorint chizos, sas abistas manos
sunt ancora mentovu in sa carrela.

Telas pintadas cun sardos disinnos
mustrant bundantes feras e laores,
ammentant atropellos e suores,
ch’in totu sa pessone lassant sinnos.

Giovanni Antioco Mura
Ghilarza, 28 aprile 2005