S’orfana pedit pane (a Maruccia Santoru)
di Peppinu Mereu

Orfana, senza babbu e senza mama
a istentu trazende so sa vida.
Isculza, nuda, derelitta e grama,
a pedir’in sas giannas reduida.

A ti’eo m’invoco eletta prama,
preghende chi consoles sa famida.
Dalli pane, in terr’has haer fama
de pietosa. Eo puru ben’ ‘estida,

fia ricc’unu die, s’isfortuna
crudele m’hat bocchidu, cale cane
dae tottus iscacciadu, so dijuna.

Dae me no halzes, no, su chiz’addane;
«fragiles sunt sos benes de fortuna»,
caridadosa siast, dammi pane.

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!