Poesia in lingua sarda
S'istadea
A bortas, illacanarzu pesso ischìbbulu
a sas dies cumpridas in annos.
A su tempus nou inzénneru
impressidu che bentu manzanile
e irfinigadu de crarore a s'orizonte
mentres iscandàglio s'intumbu
de unu mutricore meledadu.
Cun s'istadea de sos Chimbanta
sos versos mios naigana naufragos
a largu in sa traschia de undhas
o si bisestrana cun ìmpetu a marrarzos
-no est pius proa de poeta
resessere a si meravizare
de chie aferrat atzudu s'esisténtzia
comente in edades primarzas.
Epuru pessigo peraulas de afìcu
e s'echilìbbriu de limbazos;
contivizo sos sinnos de s'isperiéntzia
e imbergo da unu dillìriu de vida
s'amparu pro carignare su cras.
A bortas, intardos
mi daet timoria crarizare adhae
e chirco intro s'istoria mia
sos congruos iscampiados a sa resone
chi avantzada cun passu mudu
comente in una poesia de Cabidanni
de chie ischit cun tzertesa
d'essere naschidu in Abrile.
In s'istadea ponzo su coro
-fermentarzu lieru de unu sensu perfetu-
pro ateras dies anzenas e disconnotas
ue su benidore est solu intuimentu
de unu disizu arcanu chi lentorat s'animu.