Chin s' intumbu chi istronat in su monte
de molas* de tisiddos* e mutarzos*, ...................* Macine, *concia pelli , *mortai
hapo chircau s'oro in mudrecarzos
sedattande s' arcanu 'e s'orizonte.

E milli sentimentos m'han' ispintu
dae puntas dae pranos e da' attas
a chircare po terra milli trattas
in andalas predosas de s' istintu.

Hapo precau sas abbas divinas
e sos Deos de s'erva e de sa pache
e sa vida hapo perdiu in su nurache
difendende sa sorte 'e muridinas.

E sas janas m' han' postu sa collana
chin sas ispadas sacras de s'eroe
e duos iscudos; Pedde 'e cuddu 'oe
mortu chin saettas d 'ossidiana.

E m'han fattu una tumba de gabale* ..................*di valore
chin sas predas prus artas iscarfias
e postu m' han' sas ferramentas mias
de brunzu: unu mazu, una 'estrale.

Però sa nott' intendo sas istrias
galu irridentes chin boghes istranzas
ispittulande* cuddas carres lanzas
dae s' andare 'e su tempus cossumias.

E a bortas eternas pesadillas* ................. ............*incubi
li ponen' a su sonnu su marranu
cando 'ido sa terra rutta in manu
a fizos de Nerones e de Sillas* .......... ..................*Condottieri romani

E ando chin cust' anima rundana
In mesu sas domittas de Abini
po chi sa zente iscat de chie fini
sas prendas d'un' eressia forte e sana.

Ma m'apasaguat* una calidade ................ ...........*mi rasserena
de trieddas* cuncordos e tenores .... ...................*launeddas
chi s' anima lis chinghet che fiores
a cuddos fizos de s'identidade.

E tando custos brunzos semper bios
li torran' a s' eressia atteru pannu!
Fortis est custu s' iscusorzu mannu
chi son chircande custos fizos mios.

2° premio Teti 2013