Rundines ismarridas.

Unu mundu ’e lacanas,
a chirriare zenias e colores,
a paltire benes e richesas,
lacanas, fatas de timorias,
interessos e aspresa.
Lacanas de ignorantzia.

Ma, cun su entu,
chi trazat sonnios e isperas,
bolan, che rundines ismarridas,
a chircare amparu,
una vida pius deghìle,
in s’isetu de dies lughidas,
de promissas de paghe,
e de frades,
fizos de su matessi Deu,
de sa matessi terra.

E los agatan,
prontos … a los isantiare,
che feras dannalzas,
a che catzare cun issos
s’ispiju, ch’in giaru mustrat,
debilesas antigas e noas
e poberos coros chentza paghe.

E issos, ch’an cumpresu,
setzini in bancas anzenas,
e a ticu a ticu che tragan
calighes rantzigos de indiferentzia
e farfaruzas de pane revudadu,
aunzende lagrimas e disisperu,
a sa sola, mudos e frantos.

A boltas, calchi lughe s’atzendet
a ilgiarire pensamentos,
a ischidare cussentzias,
a mustrare manos,
chi cun amore sun’isterridas
pro astringher ateras manos, cun fide…

Franco Piga (Romana ‘SS’)
Bennalzu 2007