Rimas intritzadas
di Antonio Piras

A sos amigos de Iscanu (Renzo Rosa e Franco Maccioni
e de Bolotana (Luigi, Maria Ladu e Zuseppe Concas.

Duas rimas intritzo a bonu prou,
dae ora, mi nades, no' nd'iscrio.

A sos amigos bonos las imbio
ca creen ancora in antigos sonos,
las imbio a sos amigos bonos
ca creen ancora in sonos antigos,
las imbio a sos bonos amigos
ca in antigos sonos creen ancora.

Duas rimas intritzo a bonu prou,
no' nd'iscrio, mi nades, dae ora.

A Iscanesos e a zent'e fora,
Bolotanesos, frades ch'ap'in mente,
a Iscanesos e de fora zente,
frades ch'in ment'ap'eo, Bolotanesos,
a zent'e fora e a Iscanesos,
Bolotanesos ch'in ment'apo, frades.

Duas rimas intritzo a bonu prou,
no' nd'iscrio dae ora, chi mi nades.

Franco, compare Rosa, oe torrades
a nd'assazare a nou calchi cosa,
Franco, torrades oe, compare Rosa
calchi cosa a nou a nd'assazare,
Franco, torrades oe, Rosa compare
a nd'assazare calchi cosa a nou.

Dae ora, mi nades, no' nd'iscrio,
duas rimas intritzo a bonu prou.

Ischìa ch'a Piras, Luisi, a modu tou
cun Maria l'istimas e ammiras,
a modu tou, Luisi, ischìa ch'a Piras
l'istimas e ammiras cun Maria,
a modu tou ch'a Piras, Luisi, ischìa
cun Maria l'ammiras e istimas.

Dae ora, mi nades, no' nd'iscrio,
a bonu prou intritzo duas rimas.

Fato faddoncas a no' usare limas,
Concas, perdonu! No' m'as a brigare!
Fato faddoncas limas a no' usare,
perdonu! No' m'as a brogare, Concas!
A usare limas no', fato faddoncas,
a brigare no' m'as, Concas, perdonu!

Dae ora, mi nades, no' nd'iscrio,
duas rimas intritzo a prou bonu.

Poesia, iscusa po su tonu,
no' mi assistit sa Musa Talìa,
po su tonu iscusa, Poesia,
no' mi assistit Talìa sa Musa,
po su tonu, Poesia, iscusa,
sa Musa Talìa no' mi assistit
ca sa cosa perfeta no' esistit...
perdonade, deo puru mi nde rio!

Duas rimas intritzo a bonu prou...
Unu saludu a totus bos imbio.

In Iscanu, su mese de Frealzu de su 2011