Pro Saveriu

A DENANTI DE SA TUMBA

Sas rosas sun pro te amadu fiore
fizu istimadu, mama cun premura
ti las assentat in sa sepoltura
succutende su sou immensu amore.

Tue no podes bider su dolore..
e ne cumprender sa troppa amargura
ch'hamos in coro ne sa disaura
de custas dies malas de terrore.

Binchet s'amore sa tristesa crua
e in s'isettu chi benzat e bidemus
sa resurressione de sos giustos

cun sos ojos de lagrimas infustos
nos est cunfortu chi oe deponzemus
nessi fiores in sa tumba tua.

SUN TRES MESES

Sun passados tres meses e s'ammentu
est biu e duru che su disisperu.
Passan sas dies, no passan abberu
su dolore, s'affannu, su turmentu.

Tue fis unu lizu, su cuntentu
chi nos daias, s'amore sinzeru
riccu de bonu sensu e consideru
pro babbu e mama fin gosu e appentu.

Tue serenidade e allegria
daias ca fis bonu e generosu
e sa paghe amaias fizu caru.

In coro restat pro ammentu raru
onzi donu ch'haias preziosu
corona de sa tua simpatia.

Vittorio Falchi
23 de santaine de su 2010