PRO SANTA CADRINA

Cadrina isculta custa ‘oghe mia
de sa musa mi mancat sa vena
m’est in su coro affannu e pena
solu pro te ‘eo canto in poesia

Calma Cadrina su tristu piantu
de chie sempre ti pedit consolu
a tottu allevia in coro su dolu
amorosa isparghennos su mantu

Tue ch’has connottu ‘ene su turmentu
pramma ‘e su chelu bella fiorida
amada e chircada fin’ in bida
Intende de sos fizos su lamentu.

Si cheres chi nois ti invochemus
pro chi sighire s’ imprenta tua
abbaida custa terra e aggiua
ca cum s’aggiudu tou fortes semus.

Che arvure fozida in beranu
profumad’ a Tie sempre su coro
de affettu amorivile tesoro
de santa puridade ogni manzanu.

Fiore de naturale bellesa
columba cumpagna ‘e sa Maria
de sos coros chi t’aman allegria
de sas animas tristas ses difesa.

Bella immagine chen’unu neu
in terra de sas reinas candore
in chelu de sas istellas lugore
morte has lead ‘in s’amore ‘e deu

Postu t’hana sos anghelos corona
cum mill’ e piùs lizos inghiriada
a sos altos de chelos pigada
dae Mores acclamada Patrona.

Ispande lughe ch’istella lugosa
pro tottu gemma innidu fiore
isparghe ranos de pagh’ e amore
e su caminu profumed ‘e rosa

Rosina Cossu (Mores - SS)

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!