Pro sa laurea de Antonella Pinna
di Giuseppe Concas

Minde so, dottos Pinna, cuntentadu
su degheotto a sero, in Sant’Andrìa:
su duamizaesette a domo mia
allegramente m’as telefonadu.

De fiza tua sas novas mi as dadu,
m’at fattu piaghere, non l’isch’ìa;
es fruttu de sa ostra cumpanzia
cun Rosina chi azìs allevadu.

E arrivada es sa die bella,
sa chi cun ansia bos isettaìzis;
dae primma seguros za nde fizis
ca bene preparada est’Antonella.

Peppe bos dàt totu sos onores
ca francamente bollu meritades,
modestos sas usanzias cunservades
e creschinde ammaduran sos valores.

Como totu pro Antonella sos onores
cun affettu dae coro bi los dades,
cun d’ unu bellu invitu preparades
sa festa sua ca sezis signores.

Bi as pensadu e ammentada
de sos annos de sa primma iscola?
Cando andare non podìas sola
fis dae babbu o mama accumpanzada.

E as sighìdu sa mattess’ istrada,
sempre currinde che una crabola,
finas chi ses a s’iscopu arrivada,
a zovanedda de sa menzus vola.

Como t’augùro salude e fortuna
in su triballu e bene sistemada,
da unu amore sinzeru accumpanzada
e male mai non tind’andet una.

Serena e felize a donzi edade
dae sole e luna illuminada;
onzi grassia ti ènzat accansàda,
a sos chent’annos cun felizidade.

Mi restat solu ‘e bos ringraziare,
mi azis carculadu e nde so gratu,
e-i su bonu trattamentu fattu
non podet s’amigu irmentigare.

Deo apprezzo su bonu trattare
cuntentu si es s’amigu soddisfattu.
Rinnovo sos augurios a Antonella,
genitores saludo e parentella. -

In Bolotana, su 22 de Sant’Andrìa de su 2007