Pro cust'abba dulche
de Antonio Rossi

Canto cando m’infundet s’abba dulche de su riu asulu de sa vida,
canto pro totu sos rusignolos de sa notte chi buffan lentore coloradu
e canto e canto pro sos basos de su chelu ch’isfioran sas laras de sos anghelos abbelados,
canto sempre a sa funtana ‘e sa vida, pro sos rios, pro su mare, pro sos lagos e sos calarighes.

Canto cando s’abba t’infundet tenneru lizu ‘e luna chi drommis che unu nignu,
canto cando ti chinas sutta su pesu de unu pabareddu chi ti cheret carignare,
canto pro sa mendula imbianchida da-e su nie, pro s’olidone doradu, pro s’armuttu brundu,
canto sempre e sempre torro pro iscultare s’antiga melodia de s’innamorada chigula.

E canto pro sas fadas e pro sas sennoriccas chi dansan in sos incantosos albores chena nues,
canto pro sas istellas chi pianghen, pro su sognu de unu piscadore de rundines de mare,
canto pro su mare, sempre canto pro cust’abba giara chi mi restorat sa cara,
chi m’innettat s’anima, chi aundat sas istupendas baddes inue viven sas reinas de su sole.

E canto pro su sole chi no asciuttet s’abba, chi non destruat sas funtanas de s’amore,
canto pro s’amore e sempre canto, pro custos fiores de coraddu chi m’illughinan,
pro sas sirenas de prata chi fruschinan infra ‘e sa rena e sas undas, infra ‘e sa vida e sa morte,
pro sas anades birdes chi si pesan in bolu e sighin sos immensos beranos.

E canto pro sos culilughes istudados, pro sos muzulos biaittos ch’isfidan sas ‘arveghes,
pro sos giardinos siccos de coppiolos chena coro, pro sos narcisos mortos infra de sos groddes,
pro sos violinos surdos, pro sas violentas manos chi mazzan su destinu
e canto sempre canto fin’a s’ultimu bisu, fin’a a s’ultima aurora.

Canto pro sas columbas e sas chilandras, pro sos pisches-mama, pro su chelu chi los accoglit,
pro sas aes chi si sun perdidas in sas longas padimas de arcos de chelu allorigados de gioja,
canto pro sa muina de sos piscadores de arpas ammutidas, canto e si canto piango,
piango e pro sempre piango, ma sun lagrimas pro atteras funtanas, pro atteros rios.

Pro atteros mares chi invocan abba limpia, pro atteros fiores, pro attera vida.