Pro corazu jeo so istadu
di Larentu Pusceddu

Est pro bincher sa morte
ch'ap'oladu
e bidu su nie eternu sut'alas de ferru
chi non s'iscazan a su sole.
Ap'idu su mare oras e oras, chena fine
e muntagnas, ferrer su chelu birde.
Frequente sas nues an cuadu a sos ocros, sa terra,
cun pruereddu de fines ranos d'abba,
candidu e leviu
a sas currentes frittas de su Polu.
Tottu si tremet, in ballallaras,
che caminande supra una soca untada.
Bastat una mumada, unu toccheddu de coro,
unu dolore, un'assustu, una siddida,
pro secare su filu de sa realidade
e ruèreche in sa perca de s'ignotu
inue tottu est iscuru,
inue est su no est.
Pro corazu jeo so istadu
e pro corazu apo a sichire a esser.

(Menzione d'onore - "Barbaza" Nuoro 1983)

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!