Primavera
de Anghelu de sa Niéra

Fusti bella Primavera
Cando fia pitzinneddu
Como non pares sintzera
C’as giradu su carveddu

Tando attisi ogni fiore
Ogni ae dae s’aera
Como as perdidu s’amore
E ses lija che.i sa chera.

Chena sole e annuada
Covacada de ierru
In su letu sa fressada
E a s’anima s’interru..

Non est bellu viver gai
Cando arrivat sa etzesa
No mi so sentidu mai
Cun fritu e debilesa.

Non mi fetas arrabbiare
Como chi mi so calmende
Mi ti ch’eto tota in mare
Sa pascescia so perdende.

Torra torra primavera
Cun cantigos de amore
Chirca d’esser pius sintzera
E battimi calchi fiore.

Si mi faghes isetare
Mi che morzo, s’iscureddu,
Chena coro e chen’ amare
Ma tue giras in carveddu.

Tzaramonbte 7 de lampadas 2016