Presoneri
de Mario Nurchis

Setzidu e serradu
in unu ‘odale
de prastica e de ferru
presoneri mi parzo

E iscadriende
in cussa zira niedda
ligadu m’intendo
a unu logu
chena comintzos
cun promissas tzegas
andende chena tempus

E abbaidende sas matas
de ru e de aliderru
de chessa e de mudeju
assazo nuscu ‘e libertade
chi ‘olat dae s’erva sadurina
e penso chi mannòi
e sos fedales
in tempos antigorios
fortzis liberos fian
dae tennicas roboticas e gai.

Ma tramesende
faltza fìt cussa libertade:
ateros fin sos dolos
ateras sas tribulìas

E tando sardu presoneri
mi parzo
betzu de seculos
chen’un’incras
chirchende su passadu
e su reposu
in tempos benidores,
in unu ‘odale mecanicu
chi mutzat sas isperas
de bera sardidade.