Presente!

1
Silvio, Giuseppe, Massimo…”Presente!”
Emanuele, Alessandro…”Za che semus!”
Pretzisu est chi totu bos mentuemus…
Alfio, Daniele…Betad’una ‘oghe!
Ivan, Orazio…”Za semus inoghe!”
Bos tenimos in coro e in mente!

2
E chie sezis? Nomenes istranzos!
Deris niunu e oe famados!
In su fronte inimigu ispravinados,
ispentumados in terras arestes,
postos a intr‘e coloridas bestes
a difender sos anzenos balanzos.

3
Ue sezis? Intendo su profumu
de sa mezus edade triulada,
de s’istrizile rosa pinnigada
da sos sùlidos de su primu ‘entu,
a tot’ora mi ferit s’alientu
chi si pesat lizeru chei su fumu.

4
Mamas in pena, bestidas a lutu,
assutade sas lambrigas a rios
ca fizos bostros sunt ancora ‘ios.
In sos ammentos no’ dent morrer mai:
òmines fortes, trisinados gai,
ch’in debadas su late no’ ant sutu.

5
Bois, isposas, bestide sos pannos
de sa passensia e de su coro forte
ca s’istimadu, fertu ‘e malasorte,
at donadu sa vida po sa paghe.
At abarrare che pedra ‘e nuraghe
a monumentu po mill’e prus annos.

6
Tue chi as s’onore d’esser fizu
de un’omine forte e valorosu
semper sias fieru e orgogliosu
de aer tentu su nomene sou:
at a esser cuntentu babbu tou
si nde leas da issu s’assimizu.

7
Fizos, maridos, babbos, riposade
ca cumpridu est como su dovere!
A costazos de cuddu veru Mere
una cadrea bo l’azis balanzada.
PregadèLu ch’aberzet dogn’istrada
po sa cuncordia de s’umanidade!

8
Enzo, Massimiliano e Andrea,
Domenico, Giovanni…Unu fiotu…!
Pietro, Filippo…”Za che semus totu!”
Alfonso… ”Deo puru za che soe!”
Stefano, Marco…Totos deghennoe!
Bantu, orgogliu de s’Italia intrea!

(Nassirya)

Antoni Piras (Scano)