PRENDAS

Cantos e ballos, armonias, sonos:
poesia, cultura, traditzione!

Chirca, Sardigna, dogni ocasione
chi ti potan totue apretziare
sas bellesas de montes e de mare,
donos chi t’at dadu sa natura.

Cantos e ballos, armonias, sonos:
traditzione, poesia, cultura!

E no’ tenzas brigonza ne paura
de portare a bandela custas prendas:
istimadas e antigas siendas
chi a medas procuran gelosia.

Cantos e ballos, armonias, sonos:
traditzione, cultura, poesia!

Chie tenet istima e simpatia
no’ rinneghet faeddos ne limbazos,
ca de Sardigna sos bonos peazos
si den portare semper a intonos!

Poesia, cultura, traditzione:
cantos e ballos, armonias, sonos!

Antigorios, apretziados donos
chi dogni sardu tenzat a manizos
po los passare de fizos in fizos,
chi no’ si perdan sas sardas zenias.

Poesia, cultura, traditzione:
cantos e ballos, sonos, armonias!

Tue, amante de sas melodias,
no’ las trascures ma tenelas contu;
tue, poeta, semper sias prontu
a dar’a sa Sardigna onor’e vantos!

Poesia, cultura, traditzione:
ballos e sonos, armonias, cantos!

E nois veros sardos, totucantos,
nessi goi unidos a fiotu,
valorizemus su ch’amos connotu
che fizos bonos de una mama ‘ona!
------------
Sona…, Sardigna, trumbas e conchizos
po ischidar’a totu custos fizos!
Sona…, chi achisten fortza e voluntade
po difender sa tua “identidade”.

(Antonio Piras (Scano)