Poesia de amore pro sa vida
de Pier Giuseppe Branca

 

Ros’ ‘e Mandrolisai, beneìtta
prenda, bizat su coro tou imbertu
in s’iscuror’ ‘e custa notte fritta,
solu in sa soledad’ ‘e su desertu.
Su nòmen’ tou cabet una frua
ruja, galana rosa purpurina,
ma s’animu costoit una lua
in sa presone a ùe ‘asos de frina
ti bàtin, dae càbulas de asprine,
nuscos a t’ispanèschere sas cristas
e bisos chi in aeras de mudine
ti carignan sas bellas pibiristas
e apprettan de s’ìnnida ermosura
tua, cussa donosa galanìa,
ch’a sos chi de a tie an fattu fura,
at a esser’ pàrfida poesia.
Poesia de amore pro sa vida,
dae sa cale, sende issos attesu,
de malesa e de òdiu, una lida
caratza in cara, lestros, s’ana presu
e, crettèndes’ ‘onzun’ ‘e issos pride
sabidor’ ‘e su prus divinu creo,
imbidiàdu t’an alentu e fide,
valorosu fior’ ‘e Samugheo.
In su riu Settìlighe (1), sas janas
timen de dèver’ tesser’ sa fola
de te furada da’ manos marranas
che un’Ifigenìa noitola.
E in s’isettu, gàrrigu de dolu
chi cunfundet s’innantis cun su como
tott’umpare, pro àere consolu,
bisan chi tue, cras, torres a domo.

(1) Riu Settìlighe: toponimo del territorio di Samughèo.

 

Premio Speciale - Sezione Poesia a tema libero - Villanovatulo 2012