Poesia
de Antonio Maria Masia

(terzine dedicate alla poesia sarda. Su alcuni temi spesso è istintivo esprimermi nella lingua d’origine, Lingua straordinariamente e naturalmente poetica… almeno per me)

Poesia dulche che frinas in abrile
calda che fogu in coro meu atzesu
dae sole allummadu a manzanile,

t’intendo tremulende dae attesu
si mi mudas in gosu sa tristura
cando perdono sos chi m’han offesu,

e mancari mi regales amargura
sempre ti naro benennida e Cara
ca mi torras felice a criadura,

cando sorrisos mi pones in lara
dèchida Musa ch’in sa terra mia
lizos regalas de bellesa rara.

Cuntzedimi como sa melodia
chi la mando a chie no est cuntentu
coment’esserat sa mezus ninnia,

ch’in su sonu li torret s’ammentu
de nuraghes, cadditos e astores
chelos biaittos cojuados a bentu.

A sos malaidos e a sos minores
dalis accunortu e bona vida
affrancalos dae tottu sos dolores,

da’ s’interighinad’a s’avreschìda
a tottu abberi, Amada, sa mente
cun boghe alta lughida pulida,

inoghe e in dogni continente
usantzias apparina e faeddos
faghe seminas bonas, e assente

mai sias, dae feminas e piseddos,
proite inue ses tue, Amada mia
ne dolu ne gherra ne iscameddos

…solu paghe, amistade, allegria.