Plastica, plastica, plastica
di Larentu Pusceddu

Est possibile chi sa terra torret che a prima
cando sa plastica non fit imbentada
pro divenner fruttu siccu in sas cresuras?
Osserba amicu cun atentzione,
peri in sos locos prus bellos e luntanos
dae s'omine dannarzu, ite bides?
Ite bides in su Gennargentu,
in su monte de Gonare e in su Montarbu,
inue solu sa cascasina
de baccas e crapas arestadas,
fracaiat a su sole e in ierru s'isorbiat?
Ite bides in medas mares nostros
como chi sa zente l'at cumpresa
chi su sole "no imbuttat sa bellesa",
ca "messare" non si podet in sa rena?
E in sos trainos siccos ite bides?
Ite bides in sos buscos
cando su focu battit derramas,
disisperu, nieddore e morte?
E in sas banchinas de cada istradone,
noos muntonarzos, ite bides?
Bides restos de cucinas ruinzadas,
banittas preucosas, gommas consumidas,
ampullas truncadas, carchinatzu e teula secada,
botteddos de cunserba e papilamine,
batterias chena garriga, frundidas,
ozu brusiadu e plastica, plastica…
plastica de cada zenia,
de cada mannaria e de cada colore.
Plastica chi luchet bianca che nie
peri in sos pranos tintieddados dae su focu,
prichizonada, ma non consumida.
Ite si podet facher, caru amicu,
datu chi su progressu non si firmat?
Torrare a s'anticoriu non si podet,
ca su tempus coladu gai restat,
ma podimus imparare de nou a caminare
in custa terra chi cheret rispettada.

B'at una leze de natura, ismenticada:
nudda si creat, nudda si distruet,
ma pro fortuna totu mudat forma.
Dae inoche podimus comintzare
bene nande a sos zovanos de oe
de mudare sos restos in ricchesa.

(2° Premiu - Sarule 1995)