Pitzinnos de Aleppo
de Sebastiano Mario Fiori

 

Current iscurtzos
in carreras de irferru,
ispettant galu sa paghe
cussos pitzinnos de Aleppo.
Ma est gherra chena fine,
tzoccos, pruere, sempes gai,
samben’e disisperu,
sos mortos in donzi contone.
Lagrimas mudas
iffundent dies de tristesa,
ispettant galu sa paghe
cussos pitzinnos de Aleppo.
Cabidann’assoliadu, est’atonzu caente,
dae susu, solu bombas,
nues nieddas,
in s’aera, nuscos de morte.
Issos artzant sos ogros a chelu,
parent sighinde putzones in bolu,
ispettant galu sa paghe
cussos pitzinnos de Aleppo.

Un’atera die, rajos de ispera,
s’iscol’aberta,
libros, zogos, bellas cantones,
manos ch’istringhent sa vida.
Son sonnios, bisiones, colores,
chena prus odiu, unu tempus benidore,
ispettant galu sa paghe
cussos pitzinnos de Aleppo.

Opera prima classificata - Premio di poesia sarda “Nanneddu Chighine” di Ittireddu (XXVII edizione 2017)