Piobi! E’ Deju chi cumanda!!
(ziu duttori e lu maniàri)


Ziu duttori - Piobi! E chi Deju ni màndia!

Finzaménti!

Daboi di un’isthiu manna di siccàgna

daboi chi s’é brusgiadda la campàgna

piobi, e chi deju ni mandia!

Finzaménti!

Lu maniari - Abà chi è vinnannàddu ! Abàni piobi!

Lu muschadeddu e tòsthu che sajméntu

lu cagnuràri s’é siccaddu tuttu.

Abà ch’é vinnannaddu l’é mandéndi!

Ziu duttori - Muddu, mi’ chi t’intendi....

Lu maniari - Minnaffuttu!

Lu maniari - Li cubi nòbi chi abìa priparaddu

cun tant’amori masthru Rosolino

parini ischutti a trùdda figiuréndi

lu zironi chi fara ...in mezz’ampulla.

Si v’anda be’ ni feddi una mizzina

e pa’ Naddari cun vosthri figliòri

forsi...vi pigliareddi una cuighìna ...

Abà chi é vinnannaddu...

Ziu duttori - T’aggiu intesu!

Cajmu chi tantu no vi poi fa’ nudda.


Lu maniari - So’ già dui cheddi chi é farendi frùscha

da li grùndi ni brinca assai furriòsa

é pisurendi tutti li carreri...

No’ abia mai visthu li isthrintògli netti

cumenti abà

ed eu puru, cumpà

no’ m’era mai acciappaddu tantu nettu.

Parò chisth’eba é una gran futtiddura

miré! No’ v’aggiu più l’abbrunzaddura!

(So’ già dui mesi e piobi finza a notti)

Lu maniari - Vi possu dì chi soggu prioccupaddu?

So pieni li bacini e l’isthagnari

lu Campidanu s’é tutt’allagaddu

e a Bosa z’ha purthaddu l’orinari.

E so’ dui mesi chi soggu iviaddu

e cussì puru Antoni me’ compari.

Lu maniari - Cumpa’, ischuseddi...voi seddi isthudiaddu...

ma...in chissu gran Diruviu Unibessàri

v’amminteddi si s’erani sajvaddi

un zappadori un masthru ed un maniàri?

E semmu in tre… e si daboi voi puru

dubissiadi immisciavvi cu’ la cocca ...

Antoni é priparendi una grabiglia

voi n’arrigheddi chissu cagnurari

e puru si poi piobi althri dui mesi

zi isthraziemmu a mariglia...foramari!!


Piobi! E’ Deju chi cumanda!!

Masthru Gì 16.10.2000

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!