Muzere cara aperi s’aposentu
“ue dromiat ca cherzo pessare
s’est menzus a gherrar’in artu mare
o in sermentosas undas de s’ozeanu
o in su crattere alluttu‘e unu vulcanu
po non connosche simile turmentu.

M’intendo galu babbu‘e custu lizu
e chirco sa oche sua su manzanu
e irvolico in sa pranta de sa manu
sos jogos suos galu che fiore
chi an dadu sentimentos e calore
in oras bellas po li narre fizu.

Pasco sas oras de cussas luguras
anima durche ca t’appo chilliau
e sos sero sa ninna appo cantau
a boghe lena chin surrisu in laras
e cuddas oras chi prim’ini raras
como mi paren prenas de cresuras.

Cantos prozettos e tottu po tene
una junta‘e sentidu èst galu inoche
a pranghere una domo chene oche<
irvettande chi torret su ‘eranu
cantos prozettos in custu mundanu
tempus chi m’at furadu donzi bene.

Cantu ridinzu chin sa cuntentesa
po t’indittare sas cosas prus bellas
ammus tocadu paris sas istellas
ammus chircadu prus de s’avenire
como solu su pruere a s’irfinire
potto tocare in cussa losa inchesa.

Un’attimu e sa vida olat’a sorte
che bentu lacrimande sas aeras
arrumban solu in s’ala sas isperas
a m’amentare sas dies bramidas
e mudas e profundas sas feridas
arrumban cumpattinde cussa morte.

Istriulos sò intende in s’aposentu
e sonos in da’intro in cuss’iscuru
ma èst solu un‘illusione de sicuru
èst sa ventana ch’èst chilliande su‘entu.

Primo Premio al Concorso "Peppinu Mereu" 2024 di Tonara