Ottana fit Ottana
di Peppinu Soru

1
Ottana fìt Ottana antigamente
como finas sa terra est cambiada,
una zittade famosa e potente
miradebolla comente est torrada:
bennida est mancu in fruttos e in zente
ca sa perfetta lughe li est mancada,
torrada est in figura 'e no cumparrer
chi a tottugantos hat dadu ite narrer.
2
Posta in su primu gradu che un'eroe
cun diversos istados, sos prus mannos,
non fìt distrutta comente a oe
in su milliedughentosbindigannos;
ma dae su seschentos bintinoe
bennida in disventuras e affannos,
mancados sun sos mannos privilegios,
distruttos sun cunbentos e collegios.
3
S'esseren faeddadu sos mattones
dian narrer comente sun distruttos
ch'in su sartu s'agatan sos muntones
de frabicos antigos, muros ruttos,
cun degheottomizza de persones
obbligados a dare sos tributos;
como distruttos cun furia tanta
chi bind'hat solu che millechimbanta.
4
Distruttas cuddas salas eccellentes
cun palazzos de tres, battor pianos
cun contes e marchesis possidentes
arcipretes, canonicos, plebanos,
distruttos Mussignores e assistentes
de sa sede apostolica sufraganos.
Si agatat unu baculu a signale
comente Vescovile Pastorale.
5
S'agatat custu e no paret modernu
de diversu metallu a sos colores;
iscrivanos, giuighes de guvernu
distruttos capitanos e maggiores,
non fin issos pro vivere in eternu
supra Deus no b'hat superiores;
nobiles professores, sos pius dottos,
in breve tempus, distruttos e mortos.
6
E cando han a torrare sos gigantes
in sas campagnas cun sos monumentos
non sind'hat bidu pius simizzantes
de istatura e ne de armamentos;
omines riccos e beneistantes
cumandaian finas reggimentos;
como sun in su fangu sepultados
terra fini e a terra sun torrados.
7
Non si devet zittade pius trattare,
torrada est a pittica patriola:
una eresia b'hat de ammirare
chi de sas tantas abarrada est sola,
sa 'e Santu Nigola titolare
ue faghen sos parracos iscola;
una cresia ebbia bi hat restadu
ue b'est Gesu su Sacramentadu.
8
Ca fìt domo de Deus dilettante
s'ultima oper'antiga militante
la dian haer fatta pius a nante
cun turres sas pius esorbitantes
b'est su disignu, s'ateru est mancante
ca mancadu est su mastru disignante,
mancat sa zente in su menzus discurre(r)
pro cussu bi hat disignu e no bi hat turre.
9
Tando fit bellu su lumen de Ottana
cun damas e marchesas e contissas;
tando gia fìt allegra onzi campana
cando b'haiat vintisette missas,
tando it bundanziosa onzi funtana
como mancu sas abbas paren issas,
prima cun tantas missas adornada
como nd'hat una ebbia e cando l'hada.
10
Mancadas sun sas musicas e sonos
teatros, artifìzios antigos,
prima b'haiat grassias e donos
ca fin devotos, cun Deus amigos,
namos chi Deus premiat sos bonos
e a malos fragellos e castigos,
pro su primu de onzi die 'e festa
como si provat famen, gherra e pesta.
11
Lassamos su passadu in pensamentu
trattamos sa presente nostra edade,
s'approvat d'ogni falsu testamentu
fide no hat su frade cun su frade,
andat su malu zelu in aumentu,
s'invidia prus de sa caridade,
sa giusta caridade s'ispiegat
a sa prova de chie mi lu negat.
12
Mancat sa vide, sa prima virtude
cudda ch'in su battizzu hamos giuradu,
mancat sa vide mancat sa salude
senza fide nessunu 'enit salvadu;
si passan annos in sa gioventude
senz'ischire su chi han professadu;
a chie no hat fide mancat tottu
prite legges de Deus no hat connottu.
13
Est tantu necessaria sa fide
cantu sa vida in su propiu gradu
Ottanesos sos ojos aberide
timo chi caligunu appet mancadu,
si bos torrat a contu prosighide
vivere in d'unu eternu malu istadu;
Mirade disgustadu paret Deus:
ispettende su bonu, 'enit su peus.
14
Lu cunsideren sos pius attivos
si sas resones mias sun profanas,
no importat chircare pius motivos
bastante amos sas grassias lontanas,
como de onzi bene semus privos
aumentadas sun solu sas ranas;
Ottana prima fìt zittade ricca
como est torrada povera e pitticca.
15
Ispiantadas dae fundamentu
sun sas ziviles abitaziones,
in manos pro memoria e ammentu
iscritturas in varios contones;
de las cumprender no bi nd'hat talentu
ma bene rappresentan sas persones
cun d'unu sole e sas cifras in mesu
sas cales naran su nomen de Zesu.
16
Mancan disignos e ateros fattos
cun sa morte si fìnit malu e bonu,
cuddos ch'a Deus fin giustos e gratos
sind'est servidu ca fìt su padronu;
mancados sun sos premios prus altos
benit discuncordadu d'ogni sonu,
Deus chi est de onzi cosa mere
faghet cuddu chi l'est in piaghere.
17
Ottana fìt Ottana antigamente
si sighit gai torrat a niente.