Ojos a chelu

di Benito Saba (2006)

Da' su chelu 'e austu imbidrïadu
in sa notte sulena
pioende che lentore sun istellas
preguntas
e dudas in su coro solovadu...
Milliones
sun galassias Soles Terras
milliardos
vidas mentes alïenas...
non las isco bisare...
e séculos a mizas sun colados
a mizas an a esser benidores...
e inoghe...
milliardos sun ómines e féminas...
e deo...
ranu 'e piúere in s'aera illacanada
unu gúttiu in su mare
frammitta 'e su fogu universale...

Semper in totue
anneos e gosos
tortos e giustissia
afficos e ingannias
peleas e uncas e amores
tírria e disaura e bonasorte...
a un'alenu
si che fuin currende a s'irroccare
dae s'istrampu 'e su tempus!...
E finit totu?
Ite sensu at sa vida e custu mundu?

In s'isprefundu 'e Calcutta un'albanesa
che mama e sorre e fiza coidadosa
est prope a chi est morzende disdicciadu
in sa carrela iscura 'e su mischinzu...
Est amore a un'istranzu mai connottu
chi mancu s'est abbistu 'e su cuviu.
Est amore a su Frade chi in sa Rughe
est morzende torra pro nois totu...

... Est s'Amore su sensu 'e custu mundu?...

... "S'Amore movet sole e sas istellas!"...

Benito Saba

Questa poesia ha conseguito la Menzione d'onore alla XVI Ediz. del PREMIO LETTERARIO DI POESIA SARDA N. CHIGHINE - ITTIREDDU - 2006