Nibbari
di Gianfranco Garrucciu

Gjugna ‘ultata di maistrali
illu tintà di pultaccilli
e furalli a chista tarra
è risciuta solu,
volta a volta, a cannuccalli,
a dalli ‘essu.
Cussi comu lu sali
chi da lu mari s’è alzatu
sill’è caggjatu innantu
a indurilli.
E la raichina
tistalda, tencinósa
immez’a chissi rocchi
à postu pedi, finz’a firilli
e fassinni pa’ sempri di patrona.
Di chissu truncu tulcinatu
tostu, rafficagnosu
pécuri e miriachi
ani ‘istu centu ‘olti
cambià peddi, ma mai
paldinni lu nuscu, lu culori.
E lu tempu
paldutu à la spiranza
in cilcà di cambialli,
di dalli, illu campà,
un altu passu
e turralli a misura
di la so ‘ulintai.
Ma iddi so cussì…
so cussì duri e rosti
li nibbari di chista tarra…
so comu lu geniu arimutu
di la me’ gjenti
scrittu illu sangu
chi curri ‘eni antichi
e chi si paldi dozzili
ill’ammenti
furati illu sonniu
a la primma notti.

Ginepri

Ogni ventata di maestrale,/nel tentare di sradicarli/e rubarli a questa terra,/è riuscito solo,/volta dopo volta,/ a piegarli/a dargli forma./Così come il sale/che si è alzato dal mare/e gli si è cosparso addosso /per indurirli./E le radici/testarde, ostinate/in mezzo a quelle rocce/si sono incuneate/sino a ferirle/e diventarne per sempre/le padrone./Di quel tronco ritorto/duro, ruvido/pecore e meriggi/hanno visto cento volte/cambiarne la pelle,/ma mai perderne/il profumo, il colore./Pure il tempo/ha perso la speranza/nel cercare di cambiarli,/di dargli, nel vivere,/un altro passo/e ricondurli al ritmo/della sua volontà./Ma loro sono così…/sono così/duri e robusti/i ginepri di questa terra…/sono come il carattere remoto/della mia gente/scritto nel sangue/che corre vene antiche/e che docile si perde/tra i ricordi/rubati nel sogno/alla prima notte.

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!