Mi curret in azudu sa memoria (Sas battor istajones )
di Larentu Pusceddu

Si s'ammentu est friscu de fattos luntanos
e sos rechentes paren aturdidos,
fortzis est sa passione chi perdet fortza e intentos
ca sa vida de donzi die divenit usantzia e abitudine.
E fattos chi solu jeo testimoniare potto,
mi colan in bisione prenos de umbras e de luches,
a bortas anneulados, ca su dolore pretendet olvidu.

S'istiu est mare de laores, arzolas, reste, suore,
pane asseadu e numeros isbiadidos de burrios
chi a sa festa de s'incunza
fruschian isperantzias de fortunas lanzas…
Apitto sas carapinnas, su turrone
e sos fusileddos disizosu abaido.
A sa festa de santu Larentu, in palas a sas roccas
ruen a mizas sos isteddos…

A carrasecare bessin sas caratzas pro ballare,
nuscare cattas e intender sas chitarras
e tenores a irzenzu contra a Zorzi.
Non distingo sos zudeos… e ascurto incantadu
sos cuncordos de Chida Santa: attittos serentinos…
e tzoccan in totu sa bidda sas poveras matraccas
sorres burdas de sas campanas mudas.

Sa Pasca est fatta de isparos, de luche intzecajola,
de burras isterridas in sos barcones.
In beranu su disizu meu est de picare su carru de mannoi
a sa festa de Santu Sidoro, ca sos boes sun adornados
de brunzos luchentes, de recramos, de ghirlandas de frores
e de arantzos ficcados in sos corros.

In s'atunzu mama comporat sa castanza e sa nutzola
dae sa tzia desulesa in custumen de focu
e adornada de pendallios de corniola e de coraddu.
Cando sos frores friscos e s'intzensu profuman sas tumbas
Comintzat sa neula a cucuzare sa luche, ca sos mortos
benin a sa mesa a manicare ammentos e a nuscare sa chidonza
chi sas bichinas m'an dadu pro su mortu mortu.

Benit pasca de Nadale cando su nie iscrarit sa notte
e dae sas teulas penden loroddos de fumu astradu e grogu.
Apo acatadu in sa ziminera fritta unu sonette a bucca,
chisina, roccos e carbone ca su pitzinnu no est mai
o bonidade o malesa.
Gai ch'est colada sa pitzinnia: che un'alenu affandadu,
che una lacrima rutta, che un'artzada de ocru.

4 Premiu – Tzittade de Finiscile 2006