Matibullosa majarza
di Anghelu de sa Niéra

A s’avreschida
cumprendo
chi ses propiu
una majarza
ca ti mustras
a su sole
comente
aggradat a tie.

Como li mustras
sa cara
poi sas palas
tue li mustras,
e cando
t’andat a geniu
li mustras
finas su sinu.

E poi
dilli dilliriende
pianu pianu
tue a su sole
mustras sa matta dae nanti
e sa matta ‘e dae segus
chi sunt tundas
che-i sa mela.

Como deo
t’ap’iscobertu
chi cando
chentu muinas
faghes innanti
a su sole
tando m’atis a beranu
cun fiores de mudeju,
e cando t’ispozas tota
a li fagher su striptis
tando m’atis
meda caldu
cun sos giogos
de istiu.

E cando
ti estis torra
e mi saludas
su sole
cun sas fozas totu grogas,
tue m’atis s’atunzu.

E cando mi giogas
puru a cua cuedda
s’ierru fritu
mi propones
‘e su giru bennidore.

Su ballu dilliriadu
pro a tie
est unu giogu
ma pro a mie
chi so annosu
est buglia
pius che mala.

Riende riende
mi murmutas:
- Sos tuos giros
sunt finidos!
Est ora de ti ch’andare.-

Gia mi ch’ando
terra niedda
gia mi ch’ando,
giradora.
E pessare ch’in sa vida
creio, chi fit su sole
a fagher su ballu tundu
e imbetze fisi tue
matibullosa
majarza.

Tzaramonte primi ottobre 2011