Mama
de Elettra Vidili
Aia giai serrau sa janna
pro custa soledade intro ‘e su coro,
da’ cando m’est mancadu su tesoro
e cun issu sa durche ninna nanna,
chi mi faghiat intendere manna
in custu mundu chentza prus decoro.
Cantu mi ses manchende Tue mama,
como m’agato puru chentza fiama.

Fus s’alluminzu de s’ilgerru meu,
sa lughe de sa mia gioventude,
m’as dadu parte ‘e sa tua virtude
e da’ Te, apo tentu su recreu,
chentza proare prus nesciunu anneu
ca mi cherias in bona salude.
Mi ses bistada mama e puru amiga
e no amos connotu mai briga.

 Depidu as bivere oriolos meda
cun noe fizos tentos a cadena,
chi allevadu as poninde bona lena.
De certu non bestimis cun sa seda
ca fuit paga finas sa moneda
ma non pro cussu mancada est sa chena.
Dadu nos as pius de su ch’as tentu
si puru t’est costadu patimentu.

Fus s’anghelu ‘e sa mia pitzinnia
e deo s’anghelu ‘e sa tua ‘ezzesa;
chi pro nudda at calpidu sa bellesa
in sas ultimas dies de agonia,
cando t’est arrivada s’ingannia
e no as tentu peruna difesa.
Faghemi lughe in cust’andala ‘e vida
gai chi parza a Tie sempre unida!


II° premio a San Sperate il 2/08/2015