Luvula
de Antonio Mura Ena 


Luvula no hat olias
ne arantzu e nen limone,
ma hat chessa e hat lidone
in Montarvu e in Gronias.

Luvula parma no hat,
ca cheret abba sa pranta:
la vattin a chita santa
dae Locula e Pasata.

Sa parma ‘e Baronìa
no est una parma vera,
ma est una parma via
bianca chei sa chera.

Luvula no si dat bantu
de Elèna e Clori ermosa,
bellas son atterettantu
Matalena e Nicolosa.

Luvula no hat monumentos
anticos, ma ‘antat gai
tumbas abertas a bentos
in Nudorra e in Nurai.