Luna anzonedda
di Giovanni Fiori

a sos pitzinnos de tottue

Una faghefarina 1 attesu attesu
tesset bolos de sole in sas aeras…
Farfaruzas 2 de lughes passizeras
giogan in s’infinidu chelu atzesu.

Luna anzonedda
luna cuada 3
duas columbas
in sa contonada 4
duos fiores
in sa pastera 5
pìttula pìttula
a sa tabacchera… 6

Una puddedra che bentu iscurrizat
peri sas tancas birdes de su coro.
Un’ajanedda 7 sos pilos de oro
che una fada in su sonnu s’ispizat… 8

Luna anzonedda
luna andantana 9
duas crabolas in sa funtana
duos pitzinnos
in s’abbasantera
pìttula pìttula
a sa tabacchera…

Lentu murrunzat 10 e lughet su riu,
pigat s’avréschida 11 in s’ ‘adde fozida.
Ahi cant’est bellu! Curride a sa vida!
In mesu mare torrat su navìu… 12

Luna anzonedda
luna baratta 13

duas tiriccas 14
in sa saffatta 15
chentu fainas
pro un’ispera
pìttula pìttula
a sa tabacchera…

____________________________

1 faghefarima - farfalla.
2 farfaruzas – briciole.
3 cuada - nascosta.
4 contonada - qui, angolo della strada.
5 pastera - aiola; vasetto per fiori.
6 pìttula pìttula a sa tabacchera - gli ultimi versetti di una specie di filastrocca che si cantilenava per gioco nell’infanzia.
7 bajanedda, ’ajanedda – fanciulla.
8 s’ispizat, ispizàre/si - pettinarsi, ravviare i capelli.
9 andantana - girovaga.
10 murrunzat, murrunzare - mormorare.
11 avréschida - alba
12 naviu: battello, bastimento, nave, naviglio; il ritorno di chi era partito; qui navìu per esigenze di rima e di metrica.
13 baratta - che costa poco per averla.
14 tiricca - caratteristico dolce delle nostre parti.
15 saffatta - grande vassoio.