Lu giardhinu di li fòri
di Gigi Noce

I’lu giardhinu mannu di la vidda
un fiori nasci, un rattu verdhi arreggi
e un’althra nabi(1) secca si zi mori
e, cand’è sera, lu rattu verdhi conta
li fori antigghi imparaddi i’ lu tempu.
e lu fiori minori cresci…e aischoltha.

Ma un rattu verdhi è morthu
e no ha pududdu
cuntà li fòri,
li fòri antigghi di la pizzinnia
e a lu fiori li manca chisthu contu.

Ca’ vi li po’ cuntà, candu la notti
giompi la sera e attoppa lu nieddori?
Li manca l’assaccarru(2) e chissa bozi
chi pianu pianu cuntaba be’ li fòri.

Po’ dumandallu a la luna di prata
chi aischoltha l’ischimuzu di la genti?
e, pa ischaldissi, a dumandà a lu sòri?

Manzanu, un frabainzu s’è pusaddu
sobra a lu rattu seccu e pianu pianu
riburdhurendi, cuntaddu ha una canzona
a lu fiori chi s’è appena isciddaddu.

Li conta candu un buschu mannu v’era
e mariposi di dugna curori
burabani in un zéru chena trampi
e burendi basgiabani li fiori.
E li conta di un mondu assai ipiziari
unì nisciunu mori e tutt’arreggi,
unì si po’ burà puru senz’ari.

E lu fiori s’impara la canzona
e si drommi ninnaddu da lu ventu
e, drummendi, ripiti chissi fori.

E, torra, i’ lu giardhinu di la vidda
si un fiori nasci, un rattu verdhi arreggi
e un’althra nabi secca si zi mori.

Premio speciale “Tonino Canu” al XV Concorso di poesia ACLI

1) ramo grande
2) il calore della vicinanza dell’altro; lett. la coperta

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!