Lontanàntzia
de Istèvene Flore

Sa lontanàntzia esistit
solu ca esistis tue
e si tue no bi fist
a mi la fagher penare
sa lontanàntzia tando
no fit istada prus
ne deo assentadu inoghe
chirchende de la prenare
cun sos versos de una cantone.

E si nois?
Si nois duos no fumis
navigadores collìdos
da’ una tempesta ’e amore.
A mi ischis narrer inue?
Inue nois duos che fimus?

Creo
nos fimus ispèrdidos
in d’unu desertu ’e dies
unu chelu chena nues
o unu ’entu chena peraulas
accudidu a su pasu
chena preguntas ne dudas

Proite sa lontanàntzia
est che unu filu longu
tiradu in s’aisetu
dae sas ganas mias e tuas
amantiosas
in chirca
de s’agatare a mesu.

Su restu sunt sas penas
chi no agatant assèbiu
in sos ammutinos longos
e in sas dies
prenas de soledade
mannas
cantu est mannu su mare
cando in sa brama ti chirco
e tue che ses atesu.