Logudoro
di Vittorio Falchi

Sos rios falan a mare
sempre in su matessi caminu
sos rios de Logudoro
prata e mendula in beranu.

S’anima mia est bolende
in baddijos e costeras
dae alvures de olia
a cheddas de laghinza ispartas.

Una rosa vellutada
est sa muida de s’abe,
s’abe chi ‘olat a essas
in s’armonicu manzanu.

Unu nuraghe de cantones
risonat in sos montijos:
Othieri in cappellina
e Bonorva ancora in ragas.

Piaghe si ch’est fuinde
s’est fuinde a Tzaramonte
fuet in caddos de ferula
e de canna allentorida.

Sos rios de Logudoro
brincos de trota e ambidda
falan a muida de borre
in sas baddes assoladas.

Ma cando hap’a torrare
a sas albeschidas tuas
a sas frinas serentinas
Logudoro addurmentadu?

16 de bennarzu 1983