LITERA A SU FRADE JUBANNE PAULU SICUNDU

Caru Jubanne Paulu Sicundu,
T’iscriet un’umìle cristianu
Chi pranghet pro s’andatzu de su mundu.

Chin su Zudeu et su Musulmanu
De su matessi babu semus fizos:
Picanos totu cantos a sa manu,

Ca sa tristura brujat custos chizos
In s’ïder tantos Cristos mutilados
Et losas cucuzadas chin sos lizos

In s’Eden dae Deus pastinados.
Pitzinnos chi m’ammentant s’Ecce Homo
Prus mai hant a currer in sos prados

De lutu ammantados. Galu como
In custu novu Seculu “potente”
Gosar’ ‘e su calore de sa domo

Un’utopia est pro meda zente.
Non b’hat prus cosas zustas in sa Terra:
Su miseru abarrata perdente,

Totu sa vida colat serra serra,
Apedicadu semper da’ sos mannos
Chi, “pro diritu”, pilisana gherra

Creschende de sos poveros afannos,
Miseria, oriòlos, tribulias.
Sunt prenos d’amargura custos annos

Colados chin sas pejus maladias
Ch’ isperrant su costaz’ a su Signore.
Jubanne, custas pacas rimas mias

Cherent a pastinare su fiore
Chi si mutit ispera: tando fache
Chi torret dae nou s’isplendore

Chi s’omine connoschet chin sa pache!
Pro totus luchet sa matessi luche,
Ballamus totus intr’ unu nurache ;

Ma s’ïder tantos Cristos, una gruche,
Su respir’ a su mundu nde li secat.
Unu signale a sos “deos” juche,

A sa zente chi gherrat et chi pecat,
Un’aerita nova, pro chi pessent!
In su mentres su mund’ in pare precat
Pro chi cust’ agonìa como sessent.

==========

Est una litèra a su papa Jubanne Paulu Sicundu, iscrita cando fit galu bìu. Si bidet deretu chi l'avedho a tue e lu giamo amicu ca, bessende isse su vicariu de Cristos, su chi hat leadu su locu de Santu Predu dae papa in papa, e bessende Cristos, pro s'umanidade cristiana, comente unu frade, amicu de totus, m'est parfida sa cosa piùs zusta a lu mutire che unu frade, peri si, in su costumene, lu giamant cun rispetu "Sua Santità".

Antonio Brundu