Li fuggaroni
di Pomepo Calvia

Ciara è la luna sobbra li cariasgi.
Chi bedda fantasia di fuggaroni!
Ti pigli una pizzinna e ti la basgi,
a cumpari e a cummà di Sant'Antoni.

Vaggiani e vecci lu cori no istasgi.
Li vaggiani hani in cori li tizzoni
e li vecci hani in l'anima li brasgi.
A cumpari e a cummà di fuggaroni!

Li vaggianeddi istazini attizzendi:
n'isceddani la merula drummidda
a chisca luzi chi pari di dini.

Canta la meruledda brinchittendi:
sott'a l'ala i li cori è la fìridda,
attenti vaggianeddi i l'utturini.