Lassa, Segnore...

di Benito Saba

 

De Mòïse a sa leze obbedïende,
giuttu L'an a su Témpiu su Pitzinnu
Zuseppe cun Maria a Lu mustrare
Primogénitu a Deus e Lu dare
e pro bontade Sua riscattare
cun d'una gioba 'e tùrtures offertas.
Simeone in su Témpiu an atopadu:
s'ómine santu e giustu isettaiat
su promissu cunfortu 'e Israele,
ca s'Ispíritu a isse aiat nadu
chi mortu non esseret chentza prima
bídere su Messia sarvadore.
E Simeone in bratzos at leadu
Gesus, beneighende 'e coro a Deus:
"Como lassa, Segnore, andare in paghe
su servidore tou, chi at bidu
sa salvesa chi Tue as preparadu
pro sos pópulos totu de sa Terra,
lughe a illuminare sos paganos,
glórïa 'e Israèl, pópulu tou! ".
A Maria santissima ispantada
faeddadu at isse in profetzia:
"Pro sa ruina e sa resurressione
in Israèl de zente e zente meda
Isse est inoghe, de contradissione
sinnu, a tale chi de coro issoro
totu sos pensos sian isvelados.
E crudele un’ispada acutada
T‘ada s'ànima santa a trabassare! ".
E Anna 'e Fanuele, profetissa,
su Pitzinnu mandadu, at reconnottu,
pro sa redentzïone 'e Israele
e Deus laudende at alabadu!
A Nàzaret cun Gesus sun torrados.
Sanu Isse creschiat e pius forte,
pïenu ‘e sapïéntzia, subr'a Isse
fit sa Grátzïa Eterna illacanada.
Miràculos a giogu non faghiat,
nemmancu curïosas maravizas,
bïatzu e bonu e caru… unu pitzinnu!

(Cfr. Evangéliu 'e Luca, cap. 2, vv. 22-39)


Lascia, Signore...
Alla legge di Mosè obbedendo, / al Tempio ha portato il Bambino / Giuseppe con Maria per presentarLo / Primogenito a Dio e offrirLo / e per bontà Sua riscattarLo / con l'offerta di una coppia di tortore. / Nel Tempio Simeone hanno incontrato: / quell'uomo santo e giusto aspettava / il promesso conforto d'Israele / poiché a lui lo Spirito aveva detto / che non sarebbe morto senza prima / vedere il Messia salvatore. / E Simeone in braccio ha preso / Gesù benedicendo di cuore Dio: / " Ora lascia, Signore, andare in pace / il servo Tuo, che ha visto / la salvezza che Tu hai preparato / per i popoli tutti della terra, / luce per illuminare i pagani / gloria d'Israele, Tuo popolo! ". / E a Maria santissima meravigliata / egli ha parlato in profezia: / " Per la rovina e la risurrezione / di molte persone in Israele / Egli è qui, di contraddizione / segno, così che dei loro cuori / i pensieri tutti sian svelati. / E crudele una spada affilata / l'anima santa Ti trapasserà! ". / E Anna di Fanuele, profetessa, / ha riconosciuto il Bambino mandato / per la redenzione d'Israele, / ha lodato e reso onore a Dio! / A Nazaret con Gesù son ritornati. / Sano Egli cresceva, (sempre) più forte, / pieno di sapienza, sopra di Lui / era la Grazia Eterna infinita. / Non faceva miracoli per gioco, / neppure curiose meraviglie: / vivace e buono e caro... un bambino!