Repentinas m’essides
sentza dàre-mi avvisu
tant’est chi non resesso a bos tratènner,
d’ìmpitu mi fuides
chin fàghere detzisu
mancari aju nde tenza, a bos mantènner
in s’ampàru ‘e su prantu,
proghi a sa sola... isfoghe in logu frantu.

Epuru pesso tando
si b’essèret a modu
chi geo sia a detzider su motu,
ma nudda bos cumando...
mancu cando unu nodu
in bula mi si fròmmada de botu,
chin su sucutu in cara
chi mi falat... frimmèndesi in sa lara.

Che mama, ch’at s’infante
istrintu forte a issa
bos paro in sos tabicos de su coro,
lassende cantecante
su ‘ostru ghissa - ghissa
chi m’iscurrat in s’intimu decoro,
pro che fèrrere torra
a sos tocos corales de petorra!