La vintana di lu cori
de Maria Antonietta Noce

Lu ventu sariddu passendi
l’ari pagliosi ha iffruniddu
e, a carasori, li bori e,
si so infaraddi in mari.
Àggiu sarraddu la vintana di lu cori
e più no passa dozzi l’arenu
chi ciaru ha tinnu di puisia.
Àggiu tancaddu cun barrasoni
di prunizza niedda e ipinosa
l’àiddu antiggu di lu giardhinu
undì fiurìa l’araru, l’ippìggura,
e sintori v’éra i’ l’ària netta
di sònnii e fòri mariósi
cuntaddi a bozarédda, guasi a cua.
Lu ventu sariddu m’ha rigaraddu,
ridendi e imbiffendi, iffidiaddu,
troppi visioni di morthi isthraziaddi,
di fraddeddi innuzzenti siquisthraddi,
di criadduri isthiniaddi e famiddi.
E la bozi mea s’è affrisciadda
i’ l’asghasthóru attugaddu da lu dóru.
Tancaddu àggiu la vintana di lu cori
e v’è bùggiu i’ l’appusèntu meu…
Soru una zirìglia a moristhùda
inciarièggia un cuzoreddu
luntanu e immintiggaddu.

03.11.06

I prèmiu ex aequo Osile 2012