La ghèrra di li pòbari
di Gigi Noce

Lu mondu è in ghèrra e cument’oggi mai.

Intendu ‘ugna manzanu i’ la tivù
chi in Israele e i’ la Palesthìna
si so ammazzendi sempri pàri-pàri
e chi in Iraq lu tarròri islàmiggu
l’è fendi a l’USA un althru Vietnam.

Li tarebàni si so tòrra aunìddi
e v’è tòrra minàzza di cumbàtta
ma sobratuttu si fabédda sempri
di lu “tarròri”
l’àimma più vigliàcca
e più trattadda
pa ca’ è troppu “vizìnu” a l’Occidenti.

Ma nisciùnu fabédda d’althri ghèrri
li ghèrri di li pòbari e li còzzi
chi no intarèssani a nisciuna tivù.

In Cecènia i’ lu Nèpa’ in Kascemi’
in Uganda, in Burundi, i’ lu Suda’
vi so ghèrri chi fràzani la genti
ghèrri longhi, tropp’anni
unì conti li morthi a mill’a milli
a miriòni li guàsti, l’isciumpiàddi
e tanti piccinnèddi
piccinnèddi innuzzènti
pa sempri ifriguràddi

Figliòri chèna babbu
criscìddi chèna un gióggu
chèna più un apusèntu, chèna fóggu
e mammi, tanti, visthùddi di duròri
chèna più làgrimi e tantu disipèru
fèmmini... chèn’amori.

Premio speciale del Presidente ACLI di Sassari Elmas 2005