It'est sa libertade? Est su prus beru
sustentu ch’ant bisonzu sos sentidos?
It’est sa libertade? Est cudd’isperu,
da umbe a bortas, nos semmus fuidos?

It'est sa libertade? Est una nue
nida che nie friscu ‘e Gennargentu,
ch’apicada a sos sulos de su ‘entu
riet a sos mundanos de totue,
e si denotat coros rue-rue
in trempas d’afeladu sentimentu,
los tentat, dispensende-lis...fiera,
sa sienda prus lùghida e bertera!

It'est sa libertade? Rusignolu,
ch’isparghet alas donosu e galanu...
e pomposu in sos nuscos de beranu
mìriat su chelu asulu... e pigat bolu,
piulende andireddas de cossolu
da-e cando su sole chitulanu,
abbratzat chin sos rajos tintos d'oro
donzi cuzone 'e abbìtu…e donzi coro?

It’est sa libbertade? Chestione?
O est su tibbitabba 'e sa chimera?
O dùbbios chi brincammus a gropera
pro los domare a sa zusta rejone?
O puru est cudda durche bisione
chi nos carignat in sa sonnighera
proghi a s’avrore nos dòbben in petu
tòccos ch’intonan sonos de Deretu?

It'est sa libertade? Sas bideas,
chi ti ‘èstin s'intragna ‘e su chi sese,
sentza dòrchere nudda a su chi crese
mancari ti minètene trobeas?
Est beru... sa trobea lìgat pese
ma non su pessu; ch'est cussu ch'impreas,
pro sighire a chircare a tot'intentu,
s'àndala lìbbera 'e su pessamentu!

Terzu Premiu al 33° concorso poesia in lingua sarda Sant’Antoni de su O’u – Mamoiada 2024